Ֆոլացին դ/հ 5մգ №30

Կիրառում Ֆոլացինն օգտագործվում է ֆոլաթթվի պակասի բուժման և կանխարգելման համար, որն առաջացել է անհավասարակշիռ կամ ոչ լիարժեք սնուցման հետևանքով: Այն նաև օգտագործվում է ֆոլաթթվի պակասի հետ կապված տարբեր տեսակի սակավարյունությունների բուժման և կանխարգելման համար, ինչպիսիք են մակրոցիտային հիպերքրոմային սակավարյունությունը, դեղորայքով և իոնացնող ճառագայթմամբ պայմանավորված սակավարյունությունն ու լեյկոպենիան, մեգալոբլաստային սակավարյունությունը, հետվիրահատական սակավարյունությունը, տարեց մարդկանց մոտ սիդերոբլաստային սակավարյունությունը, բարակ աղիքի հիվանդությունների, սպրուի և մալաբսորբցիայի համախտանիշի հետ կապված սակավարյունությունները: Դեղը ցուցված է հղիության և կրծքով կերակրման ընթացքում սակավարյունությունների բուժման և կանխարգելման, ինչպես նաև հղիության ընթացքում պտղի մոտ նյարդային խողովակի արատների զարգացման կանխարգելման համար: Բացի այդ, Ֆոլացինն օգտագործվում է ֆոլաթթվի անտագոնիստներով (օրինակ՝ մեթոտրեքսատ, սուլֆամեթօքսազոլ-տրիմեթոպրիմի համակցություն) և հակաէպիլեպտիկ դեղամիջոցներով (ֆենիտոին, պրիմիդոն, ֆենոբարբիտալ) երկարատև բուժման ժամանակ: Ինչպես ընդունել Ֆոլացինն ընդունվում է ներքին: - Ֆոլաթթվի պակասով պայմանավորված մեգալոբլաստային սակավարյունության բուժման համար՝ օրական 5 մգ՝ 4 ամսվա ընթացքում: - Մեգալոբլաստային սակավարյունության կանխարգելման համար՝ օրական 2,5 մգ: - Մալաբսորբցիայի, աղիքային բորբոքային հիվանդությունների և անհավասարակշիռ կամ ոչ լիարժեք սնուցման դեպքում մակրոցիտային սակավարյունության կանխարգելման և բուժման համար՝ օրական 15 մգ: - Սպրու հիվանդությամբ տառապող պացիենտներին՝ օրական 5-15 մգ: - Պտղի մոտ նյարդային խողովակի արատների զարգացման կանխարգելման համար՝ օրական 2,5 մգ՝ նախատեսվող հղիությունից 4 շաբաթ առաջ և շարունակել ընդունումը հղիության I եռամսյակի ընթացքում: Հակացուցումներ Դեղի բաղադրիչների նկատմամբ գերզգայունություն, պերնիցիոզ սակավարյունություն, չարորակ նորագոյացություններ, կոբալամինի պակաս: Նաև հակացուցված է մինչև 12 տարեկան երեխաների մոտ: Պահպանման պայմաններ Պահպանման ջերմաստիճանը՝ 2-ից 25 աստիճան C: